Total Users : 9762
Total views : 11426
Who's Online : 2
રીતેશ પરમાર (ક્રાઈમ રીપોર્ટર )
ત્રણ કિશોરીઓ ને સિગારેટની લત લાગી અને ચોથી કિશોરી પર દબાણ કરી સોશિયલ મીડિયા સાઈટ પર પોતાના સિગારેટ પીતા ફોટો પોસ્ટ કરાવ્યા
ઇન્સ્ટાગ્રામ પર પોસ્ટ માતા પિતા જોઇ જતા મામલો ઘર સુધી પહોંચ્યો અને મચી બબાલ
ટાઈમ્સ ઓફ અમદાવાદ.181 અભયમ મહિલા સુરક્ષા હેલ્પ લાઇન ની વડોદરા ટીમ પાસે મદદની માંગણી કરતા એક કોલમાં સમાજને ચેતવણી આપતી ચોંકાવનારી હકીકત સામે આવી છે.અને ટીમે આ બનાવ સાથે સંકળાયેલી અને સિગારેટ ના વ્યસનમાં સપડાયેલી કિશોરીઓની આ ખોટું હોવાની સમજાવટ કરી હતી.
ઘટનાની વિગતો આપતાં મહિલા સુરક્ષા સંસ્થાના કો ઓર્ડીનેટર ચંદ્રકાંત મકવાણા એ જણાવ્યું કે, એક કોલમાં કિશોરીઓ એ તેમની સાથે એક દંપતી મારકૂટ કરતું હોવાની ફરિયાદ કરી,મદદ ની માંગણી કરી હતી. ટીમ ઘટના સ્થળે ગઈ ત્યારે જાણવા મળ્યું કે એક ફ્લેટમાં રહેતી કિશોરીઓ ને સિગારેટ પીવાની લત પડી હતી. તેમણે અન્ય એક મિત્ર કિશોરીને દબાણ કરીને પોતાના ફ્લેટ પર બોલાવીને સિગારેટ પીવડાવવાનો પ્રયાસ કર્યો.
ચોથી કિશોરીએ ઇનકાર કર્યો ત્યારે એ ત્રણ કિશોરીઓ એ પોતાની આ ચોથી મિત્રને સમ આપીને ,પોતાના સિગારેટ પીતા ફોટો ઈન્સ્ટાગ્રામ પર મુકાવ્યા. આ બાબત ઉપરોક્ત ત્રણ પૈકીની એક કિશોરીના માતાપિતા ના ધ્યાન પર આવતાં, તેમણે ફોટો પોસ્ટ કરનારી કિશોરીના ઘેર જઈ અને ત્રણ પૈકીની અન્ય બે કિશોરીઓ સાથે ગેર વર્તન કર્યું હતું જેમાં સહાય મેળવવા અભયમને કોલ કરવામાં આવ્યો હતો.
સંસ્થાની ટીમે ચારેય કિશોરીઓ ને આ પ્રકારના વ્યસન થી દૂર રહીને ભણતર પર ધ્યાન કેન્દ્રિત કરવા સમજાવટ કરી,મામલાનો ઉકેલ આણ્યો હતો. સમાજ માટે ખરેખર આ ખૂબ ચેતવણી સમાન કિસ્સો ગણાય. અત્રે ઉલ્લેખનીય છે કે, બાળકો હવે ઇન્ટરનેટના જમાનામાં જે કંઇ જૂએ છે તેને અનુસરવાનું જલ્દી શરૂ કરી દે છે. તેવા સમયે માતા પિતાની જવાબદારી વધી જાય છે. જો બાળકોને નાની ઉંમરમાં વાળવામાં નહિ આવે તો આગળ જતા માતા પિતા મુશ્કેલીમાં મુકાઇ શકે છે.
