Total Users : 17369
Total views : 20449
Who's Online : 0
અહેવાલ-રીતેશ પરમાર (સિનિયર જર્નાલિસ્ટ)
સુરત ગ્રામ્ય પોલીસ બેડામાં સન્નાટો અને બુટલેગરોમાં સળવળાટ મચાવતા આજના સૌથી મોટા સમાચાર સામે આવ્યા છે. કીમ પોલીસ મથકના પોલીસ ઇન્સ્પેક્ટર (PI) પી.સી. સરવૈયાની ખાખી પર કાયદાનો કોરડો વીંઝાયો છે. પોતાના જ વિસ્તારમાં ઊંઘતા ઝડપાયેલા સાહેબને રાજ્યના પોલીસ વડા (DGP) એ તાત્કાલિક અસરથી સસ્પેન્ડ કરીને ઘરભેગા કરવાનો આકરો હુકમ કરી દીધો છે.
હવે સવાલ એ થાય કે આખી સિસ્ટમ નાક નીચે ચાલતા આ ગોરખધંધાથી અજાણ હતી કે પછી ‘ગાંધીછાપ’ના જોરે આંખ આડા કાન થઈ રહ્યા હતા? આ સસ્પેન્શન પાછળની ઈનસાઈડ સ્ટોરી અને બેદરકાર અધિકારીઓની પોલ ખોલતો સમગ્ર અહેવાલ.
🚨 પોતાની જ હદમાં ‘અંધારું’ અને સ્ટેટ મોનિટરિંગ સેલનો સપાટો:-
જેમની જવાબદારી કાયદો અને વ્યવસ્થા જાળવવાની છે, એ કીમ પોલીસ સ્ટેશનની હદમાં જ દારૂનું મસમોટું નેટવર્ક ધમધમી રહ્યું હતું. ગત 22 જૂનના રોજ ગાંધીનગરની સ્ટેટ મોનિટરિંગ સેલ (SMC) ની ટીમે સ્થાનિક પોલીસને અંધારામાં રાખીને કીમ વિસ્તારમાં દરોડો પાડ્યો હતો. આ રેડમાં SMC એ રૂ. 19 લાખનો વિદેશી દારૂ અને વાહનો સહિત કુલ રૂ. 55 લાખનો મુદ્દામાલ ઝડપી પાડીને સ્થાનિક પોલીસની આબરૂના લીરેલીરા ઉડાડી દીધા હતા.
💼 કડક સસ્પેન્શન પાછળના 4 મુખ્ય કારણો:
જવાબદારીમાંથી છટકબારી: લાખો રૂપિયાનો દારૂ સ્ટેટની ટીમ આવીને પકડી જાય અને સ્થાનિક PI ને ગંધ પણ ન આવે, એ વાત DGP ના ગળે ઉતરી નથી.
નબળું ઇન્ટેલિજન્સ નેટવર્ક:-
પોતાના વિસ્તારના બાતમીદારો સક્રિય ન હોવા અથવા તો જાણીજોઈને માહિતી છુપાવવી એ ફરજમાં ગંભીર ગુનાહિત બેદરકારી ગણાય.
નો-ટોલરન્સ પોલિસીનો ભંગ:-
ગુજરાતમાં પ્રોહિબિશન (દારૂબંધી) ના કાયદાનું કડક પાલન કરાવવાની સૂચના હોવા છતાં, અધિકારીઓનું આ ઢીલું વલણ શંકાના દાયરામાં આવે છે.
ખાખીની આબરૂને બટ્ટો:-
ગાંધીનગરની ટીમે દરોડો પાડીને સાબિત કરી દીધું કે સ્થાનિક કક્ષાએ ક્યાંક ને ક્યાંક મીલીભગત અથવા તો સદંતર નિષ્ક્રિયતા હતી.
🔥 અધિકારીઓ માટે સખત ચેતવણીનો મેસેજ:-
DGP ના આ એક જ ઝાટકાએ ગુજરાત પોલીસના તમામ ઉચ્ચ અધિકારીઓને લાઈન પર લાવી દીધા છે. આ કાર્યવાહી એ સ્પષ્ટ સંકેત છે કે હવે એરકંડિશનર કેબિનમાં બેસીને માત્ર વહીવટ ચલાવનારા સાહેબોના દિવસો પૂરા થયા છે.
જો તમારા વિસ્તારમાં ગેરકાયદે પ્રવૃત્તિઓ ચાલશે, તો સજા માત્ર બુટલેગરને જ નહીં, પણ આંખ આડા કાન કરનારા ખાખીધારીઓને પણ ભોગવવી પડશે.
કીમ PI નું આ સસ્પેન્શન સુરત ગ્રામ્ય સહિત આખા રાજ્યના પોલીસ તંત્ર માટે એક મોટો બોધપાઠ છે કે કાં તો ફરજ બજાવો, કાં તો સસ્પેન્શન માટે તૈયાર રહો!
