Total Users : 9751
Total views : 11415
Who's Online : 0
રીતેશ પરમાર
મોહાલી, તા.5
રવીન્દ્ર જાડેજાએ વધુ એક કારનામું કરી બતાવ્યું છે. ભારત-શ્રીલંકા વચ્ચે મોહાલીમાં રમાઈ રહેલી પહેલી ટેસ્ટ મેચના બીજા દિવસે સ્ટાર ઑલરાઉન્ડર રવીન્દ્ર જાડેજાએ ખાસ રેકોર્ડ પોતાના નામે કર્યો છે. રવીન્દ્રએ શ્રીલંકાના બોલરોને એક પણ મચક ન આપી અણનમ 175 રન બનાવી લીધા છે. આ તેના ટેસ્ટ કરિયરની બીજી સદી છે.
તેના આંતરરાષ્ટ્રીય કરિયરમાં 5034 રન થઈ ગયા છે. તે ભારત તરફથી આંતરરાષ્ટ્રીય ક્રિકેટમાં પાંચ હજાર રન અને 400 વિકેટ લેનારો માત્ર બીજો ક્રિકેટર છે. તેના પહેલાં આ રેકોર્ડ માત્ર પૂર્વ ભારતીય કેપ્ટન કપિલ દેવના નામે હતો.
પૂર્વ કેપ્ટન કપિલ દેવે ભારત વતી 356 આંતરરાષ્ટ્રીય મેચ રમ્યા છે જે દરમિયાન તેના બેટમાંથી 9031 રન નીકળ્યા છે. આ ઉપરાંત કપિલે 687 વિકેટ પણ ખેડવી છે. અણનમ 175 રનની સૌથી મોટી ઈનિંગ પણ તેણે રમી છે. જ્યારે રવીન્દ્ર જાડેજા માહાલીમાં પોતાની આંતરરાષ્ટ્રીય ક્રિકેટ કરિયરની 284મી મેચ રમી રહ્યો છે. તેણે પોતાની સદીની ઈનિંગ દરમિયાન આંતરરાષ્ટ્રીય ક્રિકેટમાં પાંચ હજાર રન પણ પૂરા કર્યા છે. આ ઉપરાંત જાડેજાએ ક્રિકેટના ત્રણેય ફોર્મેટમાં 468 વિકેટ પણ બનાવી છે. તે ઈજામાંથી કમબેક કરી રહ્યો છે પરંતુ અત્યાર સુધી કમાલનું પ્રદર્શન કર્યું છે. આ પહેલાં ટી-20 શ્રેણીમાં પણ તેણે શ્રેષ્ઠ પ્રદર્શન કર્યું હતું.
33 વર્ષીય રવીન્દ્ર જાડેજાની આ આંતરરાષ્ટ્રીય ક્રિકેટની બીજી સદી છે. આ મેચ પહેલાં તે 57 ટેસ્ટની 84 ઈનિંગમાં 34 રનની સરેરાશથી 2195 રન બનાવી ચૂક્યો હતો જેમાં એક સદી અને 17 અર્ધસદી સામેલ હતી. આ ઉપરાંત તેણે 232 વિકેટ પણ મેળવી હતી. જ્યારે વન-ડેની 113 ઈનિંગમાં 33 રનની સરેરાશથી 2411 રન પણ બનાવ્યા છે જેમાં 13 ફિફટી સામેલ છે તો 118 વિકેટ પણ તેણે લીધી છે. ટી-20 આંતરરાષ્ટ્રીયમાં તેણે 326 રન તો 48 વિકેટ ખેડવી છે.
