⚖️ ભાવનગર :જ્યારે ‘ખાખી’ જ ‘ખાખી’ની દુશ્મન બને! કરોડોના વ્યાજખોરીના નેટવર્કમાં હોમાયો એક કોન્સ્ટેબલ: ગૃહ વિભાગ સુધી પહોંચશે આ આક્રોશ?

અહેવાલ-રીતેશ પરમાર(સિનિયર જર્નાલિસ્ટ)

સ્પેશિયલ પાવર રિપોર્ટ:
ગુજરાત પોલીસનું સૂત્ર છે— ‘સેવા, સુરક્ષા અને શાંતિ’. પરંતુ ભાવનગરમાં જે કિસ્સો સામે આવ્યો છે તેણે આ સૂત્ર સામે જ મોટો સવાલિયા નિશાન ઊભો કરી દીધો છે. આ કોઈ સામાન્ય ગુમશુદગી કે આત્મહત્યાના પ્રયાસની ઘટના નથી. આ એક એવી આઘાતજનક કહાની છે જેમાં કાયદાના રક્ષકો જ પોતાના જ સાથી કર્મચારીના જીવના જોખમી દુશ્મન બની બેઠા છે. ભ્રષ્ટાચારને નાબૂદ કરવા માટે બનેલી એન્ટી કરપ્શન બ્યુરો (ACB) ની કચેરીમાં બેસીને ઉચ્ચ અધિકારીઓ વ્યાજખોરીનું આખું સામ્રાજ્ય ચલાવતા હોવાના આક્ષેપથી આખું તંત્ર શરમજનક સ્થિતિમાં મુકાયું છે.

💰 કરોડો રૂપિયાની વ્યાજખોરી અને સિસ્ટમની ક્રૂરતા:-

ભાવનગર ACB ના હેડ કોન્સ્ટેબલ જયેન્દ્રસિંહ નરપતસિંહ ગોહિલ ૨૦ ઓક્ટોબર ૨૦26ના રોજ અચાનક ગાયબ થઈ ગયા. તેમની પાછળ મળી આવેલી વિગતવાર ચિઠ્ઠી (નોટ) એ ખાખી વર્દી પાછળ છુપાયેલા રાક્ષસી ચહેરાઓને બેનકાબ કર્યા છે.

પ્રાપ્ત વિગતો અનુસાર, કથિત નોટમાં જે આક્ષેપો છે તે રૂંવાડા ઊભા કરી દે તેવા છે:

• ઉચ્ચ અધિકારીઓનું વ્યાજનું નેટવર્ક: ક્લાસ-૧ અને ક્લાસ-૨ ના ઉચ્ચ પોલીસ અધિકારીઓ (DySP અને PI કક્ષાના) પોતે જ કરોડો રૂપિયા વ્યાજે ફેરવતા હોવાનો સનસનાટીભર્યો આક્ષેપ છે.
• પઠાણી ઉઘરાણીનો આતંક: કાયદાના આ પદાધિકારીઓ જયેન્દ્રસિંહ પાસેથી ગુનેગારોની જેમ ‘પઠાણી ઉઘરાણી’ કરતા હતા અને તેમને અસહ્ય શારીરિક-માનસિક ત્રાસ આપતા હોવાની વિગતો બહાર આવી છે.

📢 “PI કે.બી. દેસાઈને સજા કરાવજો…” – એક આત્માની ન્યાય માટે આખરી પોકાર

આ આખી ઘટનામાં કાળજું કંપાવી દે તેવી બાબત એ છે કે, જયેન્દ્રસિંહે પોતાના પરિવાર અને ન્યાયતંત્ર સમક્ષ એક આખરી આશા વ્યક્ત કરી છે. તેમણે લખ્યું છે કે:

“મારી આત્માને ત્યારે જ શાંતિ મળશે, જ્યારે PI કે.બી. દેસાઈને સજા કરાવશો…”

જ્યારે એક સરકારી કર્મચારી, જે પોતે પોલીસ વિભાગમાં છે, તે આ હદે લાચાર બની જાય કે તેણે ન્યાય માટે પોતાની આહુતિ આપવી પડે કે ગાયબ થવું પડે, ત્યારે સામાન્ય જનતાની સુરક્ષા કોના ભરોસે? આ સવાલ આજે દરેક નાગરિક પૂછી રહ્યો છે.

🏛️ કસૂરવાર અધિકારીઓ સુધી મેસેજ: હવે બચાવના તમામ રસ્તા બંધ છે!

આ આર્ટિકલ માત્ર એક ન્યૂઝ રિપોર્ટ નથી, પરંતુ ગુજરાત પોલીસના ઉચ્ચ વડાઓ (DGP) અને ગૃહ રાજ્યમંત્રી સુધી પહોંચતો એક સીધો સંદેશ છે.

• શું કાયદો માત્ર સામાન્ય જનતા માટે છે?: જો કોઈ સામાન્ય વ્યાજખોર ત્રાસ આપે તો પોલીસ તાત્કાલિક પાસા (PASA) હેઠળ જેલમાં ધકેલી દે છે. તો પછી ખાખી વર્દીનો પાવર બતાવીને કરોડોનું વ્યાજ વસૂલતા અને પોતાના જ કોન્સ્ટેબલને મરવા મજબૂર કરતા ઉચ્ચ અધિકારીઓ સામે ગુનો કેમ ન નોંધાવો જોઈએ?
• તટસ્થ તપાસની માંગ: ભાવનગરની નીલમબાગ પોલીસ અને લોકલ ક્રાઈમ બ્રાન્ચ (LCB) અત્યારે જયેન્દ્રસિંહની શોધખોળ કરી રહી છે. પરંતુ જ્યાં સુધી નોટમાં ઉલ્લેખિત તમામ ૧૩ કસૂરવારો, જેમાં PI કે.બી. દેસાઈ અને DySP કક્ષાના અધિકારીઓ સામેલ છે, તેમની સામે કડક કાયદાકીય પગલાં નહીં લેવાય, ત્યાં સુધી પોલીસ તંત્રના આ ડાઘ ધોવાશે નહીં.

⚖️ કોન્સ્ટેબલ જયેન્દ્રસિંહને ન્યાય મળવો જ જોઈએ!

આ મામલો દબાવવાના ગમે તેટલા પ્રયાસો થાય, પરંતુ આ વખતે લડત આરપારની છે. સોશિયલ મીડિયાથી લઈને ઉચ્ચ સત્તાધિશો સુધી આ જ એક માંગ છે કે કોઈ પણ ચમરબંધી અધિકારીને તેની વગ કે હોદ્દાના કારણે બચાવવામાં ન આવે. જયેન્દ્રસિંહ ગોહિલ અને તેમના પરિવારને સંપૂર્ણ ન્યાય મળે અને વ્યાજખોરીના આ કાળા નેટવર્કનો સફાયો થાય તે જ સાચો ન્યાય હશે.