પતંગના દોરાથી વાહન ચાલકોનું જીવ ના જોખમાય તેના માટે રોડ સેફટી કાર્યક્રમ યોજાયો, yi (યંગ ઇન્ડિયન ) સંસ્થા દ્વારા દ્વિ ચક્રી વાહન ચાલકોને મફતમાં સેફટીગાર્ડ લગાવવામાં આવ્યા, અમદાવાદ પૂર્વના ટ્રાફિક ડિસિપીએ હાજર રહી સાવચેતી માટે સલાહ સૂચન આપ્યા

અમદાવાદઃ ઊત્તરાયણનો તહેવાર હવે સાવ નજીક છે. ઘણા લોકોની જેમ તમે પણ પતંગ-દોરા ખરીદવાનું પ્લાનિંગ બનાવી લીધું હશે. પરંતુ આ તહેવાર નજીક આવતા જ એવા પણ સમાચાર વધી જાય છે કે અચાનક જ કોઈ પતંગનો દોર ગળામાં આવ્યો અને વ્યક્તિ પોતાનું જીવન ગુમાવી બેઠી. ત્યારે આ નવા વર્ષે એક બાબતનો સંકલ્પ જરુર કરજો કે બજારમાંથી પતંગ દોરા ખરીદતા સમયે તમે ચાઈનીસ દોરા અને તુક્કલ નહિ ખરીદો. કારણ કે ચાઈનીઝ દોરાથી રાહદારીઓ અને વાહન ચાલકો માટે ખુબજ જોખમ કારક સાબિત થાય છે. અને દરેક વર્ષે ચાઈનીઝ દોરાથી ગળુ કપાઈ જવાથી કેટલાય લોકોના મોત નીપજે છે.

તેને ધ્યાનમાં રાખી અમદાવાદની yi (યંગ ઇન્ડિયન ) સંસ્થા દ્વારા રોડ સેફટી કાર્યક્રમ આયોજિત કરાયો હતો. જેમા અમદાવાદના ઓઢવ ખાતેના સોનીની ચાલ ચાર રસ્તા પાસે દ્વિ ચક્રી વાહન ચાલકોને સેફટી ગાર્ડ લગાવી આપવામાં આવ્યા હતા. જેથી કરીને રોડ ઉપર વાહન ચલાવતી વખતે પતંગના દોરાથી ગળુ ના કપાય અને કોઈ જાનહાની ના થાય. આ કાર્યક્રમ અંતર્ગત 1000 થી વધુ વાહનો ઉપર પતંગની દોરીથી બચવાં માટે સેફટી ગાર્ડ લગાવવામાં આવ્યા હતા. આ કાર્યક્રમમાં અમદાવાદ પૂર્વના ટ્રાફિક ડિસિપી સફિન હસન હાજર રહ્યા હતા. તેમજ તેમણે મીડિયાને સંભોધતા વાહન ચાલકોને ઉતરાયણના તહેવાર સમયે કઈ કઈ વાતોનું ધ્યાન રાખવું તેની સારી સમજણ આપી હતી. તેમજ ત્યાં હાજર તમામ વાહન ચાલકોને હેલ્મેટ પહેરવા માટે સૂચન કર્યું હતું. Yi સંસ્થાના ચેર પર્સન જલય પંડ્યા, કો, ચેર પર્સન નિશિત શાહ અને રોડ સેફટીના ચેર મહર્ષ પટેલ અને આકાશ પરીખ હાજર રહ્યા હતા. સાથે સાથે અમદાવાદ આઈ ડિવિઝન ટ્રાફિકના ACP પૂનડીયા સાહેબ અને તેમની સાથે સમગ્ર ટ્રાફિક સ્ટાફ હાજર રહ્યો હતો.

દોરો ગળામાં આવતા અનેક લોકો મરે છે

આમ તો ખૂબ મજબૂત આવતા આ દોરાથી પતંગ ઉડાડવાની ઘણી મજા આવે કેમ કે તમે અનેક લોકોના પતંગ કાપી શકો છો અને તેમ છતા તમારો પતંગ કપાતો નથી. પરંતુ આ દોરો ઘણીવાર પતંગની સાથે કોઈ પરિવારનો આધાર કે ચીરાગને પણ જીંદગીથી કાપી નાખે છે. તાજેતરમાં જ અમદાવાદમાં એક દિવસ પહેલા ચાઇનીઝ દોરાથી ગળું કપાઈ જતા 22 વર્ષીય યુવકનું મોત બન્યાનો બનાવ બન્યો છે.

પ્રતિબંધ છતા લોકો ખરીદે છે ચાઈનીઝ દોરી અને તુક્કલ

આમ તો ચાઇનીઝ દોરા અને તુક્કલ પર સરકારે પ્રતિબંધ જાહેર કર્યો છે તેમ છતા કેટલાક લોકો કાયદાની વિરુદ્ધ દોરા ખરીદીને તેનાથી ઉડાવતા હોય છે. તેવામાં જો કોઈ વાહન ચાલક આ જીવલેણ દોરામાં ફસાય તો તેના રામ જ રમી જાય છે. માટે એક વાતની આજે જ મનમાં ગાંઠ વાળી લો. કે ચાઇનીઝ દોરાથી આ વખતે તમે જ નહીં તમારા ઓળખીતાઓ-પાળખીતાઓને પણ પતંગ ઉડાડવા નહીં દો.

રસ્તામાં જીવલેણ દોરીથી આવી રીતે બચો

વાહન ચલાવો તો પૂરતી સુરક્ષા રાખો. ગળે મફલર કે રૂમાલ વીંટાળો. યુવતીઓ માટે આવા દિવસોમાં દુપટ્ટા આર્શીવાદરૂપ બની જતા હોય છે. ત્યારે પુરુષોએ પણ ગળાને જાડો રુમાલ અથવા મફલર બાંધીને જ વાહન ચલાવવું જોઇએ. ગળુ અને નાક બિલકુલ ખુલ્લુ ન રાખો. બને ત્યા સુધી આખુ મોઢુ ઢાંકીને નીકળવું. ટુ-વ્હીલર પર નાના બાળકને આગળ ઉભુ રાખવાની ભૂલ ના કરશો. તેમનું પણ મોઢુ અને ગળુ ઢાંકીને બેસાડો.

આટલું જરુર ધ્યાન રાખો

શહેરના જુદા જુદા બ્રિજ પરથી પસાર થતાં ખાસ સાવચેતી રાખો. સામાન્ય રીતે બ્રિજની ઉંચાઈ અગાશીઓની સમાન હોવાથી બ્રિજ પાસેથી દોરા પસાર થવાની પૂરેપૂરી શક્યતાઓ હોય છે. તેથી બ્રિજ પર ગાડી ધીમે ધીમે જ હંકારો. આ દિવસોમાં શહેરમાં વાહનની સ્પીડ બને એટલી ઓછી રાખો. ઝડપી વાહનમાં જો દોરો પાસેથી પસાર થાય તો તે વધુ જીવલેણ સાબિત થઈ શકે છે.