મોતના સોદાગરો પર કમિશનરનો હથોડો: શાહપુરમાં PCB ત્રાટકી, ૪ ઝેરના વેપારીઓ જેલભેગા! નકલી દારૂની ફેક્ટરી નેસ્તનાબૂદ!

અહેવાલ-રીતેશ પરમાર(સિનિયર જર્નાલિસ્ટ)

અમદાવાદ:રૂપિયા કમાઈ લેવાની આંધળી લાલચમાં નિર્દોષ લોકોની જિંદગી સાથે જીવલેણ ખિલવાડ કરતી એક અત્યંત ગંભીર ઘટના અમદાવાદના શાહપુર વિસ્તારમાંથી સામે આવી છે. સસ્તા દારૂમાં કેમિકલ અને ફ્લેવર ભેળવી પ્રીમિયમ બ્રાન્ડના નામે વેચવાનું આ આખું કૌભાંડ કોઈ સામાન્ય ગુનો નથી, પણ માનવ જિંદગીઓ સાથે રમાતી મોતની રમત છે.

પરંતુ અહીં સૌથી મોટો અને વેધક સવાલ એ ઊભો થાય છે કે, સ્થાનિક પોલીસની નાક નીચે આ ગેરકાયદેસર કાળો કારોબાર કોના ઈશારે અને કોની મહેરબાનીથી ધમધમી રહ્યો હતો?

💸 ભ્રષ્ટાચારની ‘કટકી’ અને સ્થાનિક પોલીસની નિષ્ક્રિયતા:-

સ્થાનિક સૂત્રોના ગંભીર આક્ષેપો મુજબ, આ વિસ્તારમાં ચાલતી નકલી દારૂની ફેક્ટરીના મોતના સોદાગરો પાસેથી અમુક ભ્રષ્ટ પોલીસ કર્મીઓ નિયમિત રીતે ‘હપ્તા’ અને ‘કટકી’ ઉઘરાવતા હતા. જ્યારે કોઈ વિસ્તારમાં આટલું મોટું નેટવર્ક ચાલતું હોય, ત્યારે સ્થાનિક પોલીસ સ્ટેશનના પીઆઈ (PI) આ ગંભીર બાબતથી તદ્દન અજાણ હોય તે વાત ગળે ઉતરે તેવી નથી.

કાયદો અને વ્યવસ્થા જાળવવાની જેમના શિરે જવાબદારી છે, તે જ જો આંખ આડા કાન કરે તો સામાન્ય જનતા ક્યાં જાય? લિસ્ટેડ બુટલેગરોને છાવરતી આવી રિશ્વતખોરી સામે હવે કમિશનર કક્ષાએથી કડક હથોડો ઝીંકાય તે અનિવાર્ય બન્યું છે.

જુઓ નકલી દારૂની ફેક્ટરીમાં ઝડપી પડાયેલ ઇંગલિશ દારૂ

🎯 PCB (પ્રિવેન્શન ઓફ ક્રાઇમ બ્રાન્ચ) ની સરાહનીય ‘સર્જિકલ સ્ટ્રાઈક’:-

સ્થાનિક પોલીસ જ્યાં ઘોર નિદ્રામાં હતી અથવા તો ભ્રષ્ટાચારના ચશ્મા ચડાવીને બેઠી હતી, ત્યાં અમદાવાદ પોલીસ કમિશનરશ્રી અને પીસીબી (PCB) ની ટીમે અત્યંત પ્રશંસનીય અને સચોટ કામગીરી કરી બતાવી છે. પીસીબીના પીઆઈ અને તેમની બાહોશ ટીમે ચોક્કસ બાતમીના આધારે શાહપુરની મઢવાળાની પોળમાં ત્રાટકીને આ સમગ્ર નેટવર્કનો પર્દાફાશ કરી નાખ્યો.

જો પીસીબીએ સમયસર આ દરોડો પાડીને ૨૨૭ બોટલો સહિતનો આ નકલી જથ્થો જપ્ત ન કર્યો હોત, તો આ ઝેરી અને નકલી દારૂ કેટલાય લોકોના પેટમાં રેડાયો હોત. ભૂતકાળની લઠ્ઠાકાંડ જેવી દુર્ઘટનાઓ સાક્ષી છે કે આવા નકલી કેમિકલયુક્ત દારૂના કારણે કેટલાય પરિવારો પાયમાલ થઈ જાય છે અને લોકો જીવ ગુમાવે છે. પીસીબીની આ ત્વરિત કાર્યવાહીએ અમદાવાદને એક મોટી દુર્ઘટનામાંથી બચાવી લીધું છે.

🔍 હવે આગળ શું?:-

અમદાવાદ પોલીસ કમિશનરના કડક વલણને પગલે હવે એ દિશામાં તપાસ લંબાવવામાં આવી છે કે આ નકલી પ્રીમિયમ દારૂ ક્યાં અને કોને સપ્લાય થવાનો હતો. શાહપુર પોલીસ સ્ટેશનમાં પ્રોહિબિશન એક્ટ હેઠળ ગુનો તો નોંધાયો છે, પરંતુ જનતાની માંગ છે કે દારૂના બુટલેગરોની સાથે-સાથે તેમને આડકતરી રીતે મદદ કરનારા ભ્રષ્ટ ખાખીધારીઓ સામે પણ ખાતાકીય તપાસ કરીને કડક પગલાં ભરવામાં આવે.

👥 આરોપીઓના નામ ઝડપાયેલા આરોપીઓ:

1.મંદિપ ભાવસાર,
2.કૈલાશ બોડાણા,
3 દેવ પટેલ અને
4 દેવાંગ જાની.

ફરાર મુખ્ય આરોપી: વિક્કી ઉર્ફે બળેલો ચૌહાણ (આ કૌભાંડનો માસ્ટરમાઇન્ડ).

📂 ગુનાહિત ઇતિહાસ અને કારસ્તાન (Modus Operandi)કેમિકલ અને કલરની મિલાવટ:-

આરોપીઓ સસ્તા દારૂમાં કેમિકલ, કલર અને ફ્લેવર ઉમેરીને નકલી મોંઘો દારૂ બનાવતા હતા.

નકલી બ્રાન્ડિંગ: મોંઘી બ્રાન્ડની ખાલી બોટલોમાં આ મિશ્રણ ભરી, હેર ડ્રાયરની મદદથી નકલી ઢાંકણા અને સ્ટીકર લગાવીને તેને અસલી તરીકે વેચતા હતા.

સ્થાનિક નેટવર્ક: તેઓ લાંબા સમયથી શાહપુરની પોળમાં છૂપી ફેક્ટરી ચલાવીને લોકોના સ્વાસ્થ્ય સાથે ચેડાં કરી રહ્યા હતા.

👮 PCB ની કાર્યવાહી અને તપાસ ગુનો દાખલ:-

પીસીબી (PCB) એ ચારેય આરોપીઓને ઝડપી પાડી શાહપુર પોલીસ સ્ટેશનમાં પ્રોહિબિશન એક્ટ હેઠળ ગુનો નોંધાવ્યો છે.

મુદ્દામાલ જપ્ત: ફેક્ટરીમાંથી નકલી દારૂ, ખાલી બોટલો, કેમિકલ અને સ્ટીકરો સહિત લાખોનો મુદ્દામાલ જપ્ત કરાયો છે.

આગળની તપાસ: પોલીસ હાલ ફરાર મુખ્ય આરોપી વિક્કીને પકડવા માટે ચક્રો ગતિમાન કર્યા છે અને આ નેટવર્કમાં અન્ય કયા બુટલેગરો સામેલ છે તેની ઊંડાણપૂર્વક તપાસ કરી રહી છે.