ગુજરાતમાં શીતલહેર થી લોકો ઠુંઠવાયા, નલિયા સૌથી ઠંડુ 2 ડિગ્રી, અમદાવાદ, જામનગર,ડીસામાં પણ ઠંડા પવનથી લોકોનું જીવન અસ્ત વ્યસ્ત, મોટા ભાગના શહેરોમાં બપોરે પણ ગરમ વસ્ત્રો પહેરવાની ફરજ પડી

અમદાવાદ/જામનગર/મહેસાણા. રાજ્યના મોટા ભાગના ભાગોમાં ગુરુવારે સતત બીજા દિવસે તીવ્ર બર્ફીલા પવનો રાજ્યમાં ત્રાટકતાં ધ્રૂજતી ઠંડીનો અનુભવ થયો હતો. આ સિઝનમાં સૌથી વધુ ઠંડી હતી. કચ્છના નલિયામાં 2 ડિગ્રી સેલ્સિયસ લઘુત્તમ તાપમાન નોંધાયું હતું, જે સૌથી ઓછું છે. સાત શહેરોમાં લઘુત્તમ તાપમાન પણ 10 ડિગ્રીથી નીચે રહ્યું હતું. 11 શહેરોમાં મહત્તમ તાપમાન પણ 25 ડિગ્રીથી નીચે રહ્યું હતું. ઉત્તર-પૂર્વ તરફથી આવતા ઠંડા અને તેજ પવનોને કારણે રાજ્યભરમાં શિયાળામાં વધારો થયો છે.
ઉત્તર ગુજરાતનું ડીસા 6.9 ડિગ્રી સેલ્સિયસ લઘુત્તમ તાપમાન સાથે રાજ્યનું બીજું સૌથી ઠંડુ શહેર હતું. કચ્છના કંડલામાં આઠ ડિગ્રી, ભુજમાં નવ, ગાંધીનગર અને વલ્લભવિદ્યાનગરમાં 9.4 ડિગ્રી લઘુત્તમ તાપમાન નોંધાયું હતું. અમદાવાદમાં લઘુત્તમ તાપમાન 10 ડિગ્રી નોંધાયું હતું. જ્યાં ઠંડા પવનોને કારણે લોકોને ભારે મુશ્કેલીનો સામનો કરવો પડી રહ્યો છે. બપોરે પણ લોકો ગરમ વસ્ત્રોમાં જોવા મળ્યા હતા. ઠંડા પવનોને કારણે રાજ્યમાં લઘુત્તમ તાપમાન જ નહી પરંતુ મહત્તમ તાપમાનમાં પણ ઘટાડો નોંધાયો છે. અમદાવાદ (23.6) સહિત 11 શહેરોમાં મહત્તમ તાપમાન 25 ડિગ્રી સેલ્સિયસથી નીચે રહ્યું હતું. સમગ્ર સૌરાષ્ટ્રમાં પણ આવી જ સ્થિતિ જોવા મળી હતી. વધતી જતી ઠંડીના કારણે જામનગરમાં પણ લોકો પરેશાન જોવા મળ્યા હતા. શહેરનું લઘુત્તમ તાપમાન 12.5 ડિગ્રી સેલ્સિયસ નોંધાયું હતું. 45 કિલોમીટર પ્રતિકલાકની ઝડપે ફૂંકાતા ઠંડા પવનને કારણે ધ્રૂજતી ઠંડીનો અહેસાસ થયો હતો. પવનના કારણે માત્ર માણસો જ નહીં પરંતુ પશુ-પક્ષીઓ પણ ઠંડક અનુભવતા જોવા મળ્યા હતા. મોડી સવાર સુધી ઠંડીના કારણે માર્ગો પર વાહન વ્યવહાર પ્રમાણમાં ઓછો રહ્યો હતો. હવામાન વિભાગના જણાવ્યા અનુસાર શુક્રવાર સુધી આવું જ હવામાન ચાલુ રહી શકે છે. ત્યાર બાદ તાપમાનમાં બેથી ચાર ડિગ્રી સેલ્સિયસનો વધારો શક્ય છે.