Total Users : 5441
Total views : 6486
Who's Online : 0
અહેવાલ-રીતેશ પરમાર (સિનિયર જર્નાલિસ્ટ)
ખેરવા ગામમાં કાયદો-વ્યવસ્થાના લીરેલીરા: ભરબપોરે મરચાની પૂરી નાખી લૂંટારુઓ ત્રાટક્યા, સવાલ એ છે કે ‘સાહેબ, વેપારીઓ સુરક્ષિત ક્યારે?’
મહેસાણા:
ગુનેગારો બેખોફ છે, કાયદો લાચાર છે અને ખાખીનો ખોફ જાણે ખાખ થઈ ગયો છે! મહેસાણાના ખેરવા ગામે ધોળા દિવસે બનેલી એક એવી લોહીયાળ ઘટના સામે આવી છે, જેણે સમગ્ર પંથકના વેપારી આલમમાં ફફડાટ ફેલાવી દીધો છે. પોલીસ પેટ્રોલિંગના મોટા-મોટા દાવાઓ વચ્ચે ચાર લૂંટારુઓએ ધોળા દિવસે આતંક મચાવી, કાયદો અને વ્યવસ્થાના લીરેલીરા ઉડાડી દીધા છે.
🩸 કાળજું કંપાવી દેનારો હુમલો: વિગતો વાંચી રૂંવાડા ઊભા થઈ જશે
લાકડાના વેપારી રમેશભાઈ પટેલ અષાઢી બીજ નિમિત્તે કચ્છ જવાના હતા. તેઓ ખેરવા કો-ઓપરેટિવ ક્રેડિટ સોસાયટીના લોકરમાંથી પોતાની પરસેવાની કમાણીના ₹૧.૫૦ લાખ રોકડા અને ૧૦ તોલા સોનાના દાગીના (કુલ કિંમત ₹૧૧.૭૦ લાખ) લઈને બાઈક પર પરત ફરી રહ્યા હતા. તેમને ક્યાં ખબર હતી કે ધોળા દિવસે, જાહેર રસ્તા પર મોત તેમનો પીછો કરી રહ્યું છે!
પીછો કરી રહેલા ચાર નરાધમોએ રમેશભાઈને ઘેરી લીધા અને ક્ષણભરનો પણ વિલંબ કર્યા વગર તેમની આંખોમાં મરચાની ભૂકી ફેંકી દીધી. આંખોમાં અસહ્ય બળતરા વચ્ચે પણ જ્યારે રમેશભાઈએ પોતાની જિંદગીની મૂડી બચાવવા પ્રતિકાર કર્યો, ત્યારે આ બેખોફ ગુનેગારોની ક્રૂરતાની તમામ હદો પાર થઈ ગઈ. લૂંટારુઓએ ૧.૫ ફૂટ લાંબો તીક્ષ્ણ છરો રમેશભાઈના ડાબા હાથની આરપાર ભોંકી દીધો! લોહીની નદીઓ વહી ગઈ, વેપારી ચીસ પાડી ઉઠ્યા અને બદમાશો લાખોની બેગ ઝૂંટવીને રફુચક્કર થઈ ગયા.
❓ જનતાના વેધક સવાલો: પોલીસનું પેટ્રોલિંગ માત્ર કાગળ પર?
આ ઘટનાએ પોલીસ તંત્રની કામગીરી સામે ગંભીર સવાલોના ઘેરા ઉભા કર્યા છે:
ખાખીનો ડર કેમ ઓગળી ગયો?
ભરબપોરે જાહેર રોડ પર આવી ઘાતકી લૂંટ કરવાની હિંમત ગુનેગારોમાં ક્યાંથી આવે છે?
ક્યાં છે પોલીસ પેટ્રોલિંગ? જે રસ્તાઓ પર વેપારીઓ લાખો રૂપિયા લઈને અવરજવર કરે છે, ત્યાં ખાખીની હાજરી કેમ દેખાતી નથી?
વેપારીઓ ક્યાં સુધી સોફ્ટ ટાર્ગેટ?
દિવસ-રાત મહેનત કરીને ટેક્સ ભરતો વેપારી પોતાના જ ગામમાં સુરક્ષિત નથી, તો ન્યાય કોની પાસે માંગવો?
પોલીસ દોડતી થઈ, પણ સવાલ એ જ…
ઘટનાની ભયાનકતા જોઈને સ્થાનિક હાર્ડવેરના વેપારી અને લોકો દોડી આવ્યા હતા. લોહીલુહાણ વેપારીને તાત્કાલિક હોસ્પિટલ ખસેડાયા છે. હાલમાં મહેસાણા તાલુકા પોલીસ અને એલસીબી (LCB) નો કાફલો CCTV ફૂટેજ ફંફોસી રહ્યો છે અને ગુનેગારોને પકડવા ચક્રો ગતિમાન કર્યા છે.પરંતુ, મોટો સવાલ એ જ રહે છે કે શું પોલીસ માત્ર ગુનો બન્યા પછી જ દોડશે?
ગુનેગારોમાં કાયદાનો એવો ખોફ ક્યારે ઊભો થશે કે તેઓ આવું કૃત્ય કરતા પહેલાં સો વાર વિચારે? વેપારી સંગઠનોમાં આક્રોશ છે અને આ લૂંટારુઓ વહેલી તકે જેલના સળિયા પાછળ ધકેલાય તેવી ઉગ્ર માંગ ઉઠી રહી છે.
