સુરતના મહુવામાં દારૂના ગુનામાં પકડાયેલ ગાડીને છોડવા પોલીસ કોન્સ્ટેબલે 1 લાખ માંગ્યા! 50 હજારની લાંચ લેતા ACB ના હાથે રંગેહાથ ઝડપાયો

સુરત જિલ્લાના મહુવા પોલીસ મથકમાં ફરજ બજાવતો પોલીસ કોન્સ્ટેબલને 50 હજાર રૂપિયાની લાંચ લેતા લાંચ રૂશ્વત વિરોધી શાખાએ રંગે હાથ પકડી લેતા પોલીસ બેડામાં ચકચાર મચી ગઈ હતી. મહુવા પોલીસ મથકમાં કોન્સ્ટેબલ તરીકે ફરજ બજાવતો બુધાલાલ હેમુભાઈ માધરએ દારૂના ગુનામાં પકડાયેલા એક આરોપીની અટક કરી તેની કાર પણ જમા લીધી હતી.આ કાર છોડવા માટે બુધાલાલે એક લાખ રૂપિયાની માગ કરી હતી.

ભારે રકઝક બાદ અંતે 50 હજાર રૂપિયા આપવાનું નક્કી થયું હતું…પરંતુ ફરિયાદ લાંચની રકમ આપવા માગતો ન હોય તેણે આ અંગે ACBનો સંપર્ક કરી ફરિયાદ આપી હતી. સુરત જિલ્લાના મહુવા પોલીસ મથકમાં પોલીસ કર્મી ACBના છટકાંમા ઝડપાયો હતો.

ઘટના એવી હતી કે મહુવા પોલીસ મથકમાં પોલીસ કોન્સ્ટેબલ તરીકે ફરજ બજાવતા બુધાલાલ હેમુભાઇ માધર ACBના છટકામાં ઝડપાયો હતો. પોલીસ કોન્સ્ટેબલ બુધાલાલ માધરએ ફરિયાદીના પતિને પ્રોબિશનના ગુનાના કામે અટક કરીને તેમની પાસે રહેલ ગાડી જમા લીધેલી હતી. ગાડી છોડવવા માટે 1 લાખની લાંચ માંગી હતી. અંતે પચાસ હજારમાં પતાવટ કરવામાં આવી હતી.જોકે ફરિયાદીએ પચાસ હજારની લાંચ નહીં આપવાનું મુનાસીબ સમજીને તાપી લાંચ રુશ્વત વિરોધી શાખાનો સંપર્ક કર્યો હતો. જેથી તાપી ACBએ સુરત ગ્રામ્ય ACB ટિમને સાથે રાખીને છટકાનું આયોજન કર્યું હતું. અને નક્કી થયા મુજબ મહુવા એસટી બસ સ્ટેન્ડ નજીક પચાસ હજારની લાંચ લેતા ACBના હાથે રંગે હાથ ઝડપી લીધો હતો. અને પોલીસ કોન્સ્ટેબલ બુધાલાલ માધારની પોલીસે અટકાયત કરી કાયદેસર કાર્યવાહી કરવામાં આવી હતી. સુરત ગ્રામ્યમાં ઘણા લાંબા સમય બાદ પોલીસ કર્મી લાંચના છટકામાં ભેરવાતા પોલીસ બેડામાં ફફડાટ ફેલાયો હતો.