નિકોલમાં હિટ એન્ડ રનની ઘટના:ગરીબ પરિવારને કચડી નાખ્યું મહિલાનું અને તેના પુત્રનું મોત, અન્ય બે લોકો હોસ્પિટલમાં લડી રહ્યા છે જિંદગીની જંગ, કારમાંથી બિયરની બોટલો મળી

અહેવાલ-રીતેશ પરમાર(સિનિયર જર્નાલિસ્ટ)

અમદાવાદ:
જ્યારે આખું શહેર દિવાળીના તહેવારની રોશનીમાં ઝળહળી રહ્યું છે, લક્ષ્મી પૂજન અને નવા વર્ષના આવકારની તૈયારીઓ ચાલી રહી છે, ત્યારે અમદાવાદના નિકોલ વિસ્તારમાંથી અમીરીના નશામાં ચૂર નબીરાઓની એક એવી કાળજું કંપાવી દેતી કરૂણતા સામે આવી છે. નિકોલમાં દેવસ્ય સ્કૂલ પાસે પૂરપાટ ઝડપે ધસી આવેલી લક્ઝરી ફોર્ચ્યુનર કારે ફૂટપાથ પર સૂતેલા એક નિર્દોષ શ્રમિક પરિવારને કચડી નાખ્યો છે.

આ હૃદયદ્રાવક અકસ્માતમાં એક શ્રમિક મહિલા અને તેના પુત્રનું હોસ્પિટલમાં સારવાર દરમિયાન કરૂણ મોત નીપજ્યું છે, જ્યારે પરિવારના અન્ય સભ્યો હોસ્પિટલના બિછાને જિંદગી અને મોત વચ્ચે ઝોલા ખાઈ રહ્યા છે.

સૌથી વધુ આક્રોશ જન્માવતી બાબત એ છે કે, અકસ્માત સર્જનારી આ લાખોની ફોર્ચ્યુનર કારમાંથી બિયરની બોટલો અને ટીન મળી આવ્યા છે. એટલે કે, કાયદાના કોઈ પણ ડર વગર નશામાં ચૂર નબીરાઓ રસ્તા પર યમરાજ બનીને દોડ્યા હતા.

પરિવારનો બેકગ્રાઉન્ડ: રોજનું કમાઈને પેટ ભરતા શ્રમિકોનું પરિવાર ઉજડ્યું:-

આ કરૂણ દુર્ઘટનાનો ભોગ બનેલો પરિવાર અત્યંત ગરીબ પૃષ્ઠભૂમિ (ફેમિલી બેકગ્રાઉન્ડ) ધરાવે છે. તેઓ રોજ મજૂરી કામ કરીને અથવા રસ્તાની આજુબાજુ પાથરણા પાથરીને નાનો-મોટો વેપાર કરીને પોતાના માસૂમ બાળકોનું પેટ ભરતા હતા. તહેવારોના દિવસો હોવાથી બે પૈસા વધારે કમાવવાની આશાએ તેઓ નિકોલ વિસ્તારમાં આવ્યા હતા.

આખો દિવસ કાળી મજૂરી કર્યા બાદ, રાત્રિના સમયે થાક ઉતારવા માટે તેઓ રસ્તાની બાજુમાં આવેલી ફૂટપાથ પર શાંતિથી ચાદર બિછાવીને સૂતા હતા. તેઓને અંદાજો પણ નહોતો કે વૈભવી ગાડીઓમાં ફરતા અમીર નબીરાઓનો નશો તેમની જિંદગી આંચકી લેશે.

ઈજાગ્રસ્તો સાથે મહિલાનો સંબંધ અને તૂટેલો પરિવાર:-

કાળમુખી ફોર્ચ્યુનર ગાડી ફૂટપાથ પર સૂતેલા જે ૪ શ્રમિકો પર ફરી વળી, તેઓ એક જ પરિવારના સભ્યો હતા. મૃતક મહિલા આ પરિવારની કરોડરજ્જુ અને માસૂમ બાળકોની માતા હતી.

• અન્ય ઈજાગ્રસ્તો: ગંભીર રીતે ઘાયલ થયેલા અન્ય બે વ્યક્તિઓમાં મૃતક મહિલાના પતિ અને પરિવારનું સભ્ય હોવાનું સામે આવ્યું છે.
• માતાની છત્રછાયા છીનવાઈ:-

આ અકસ્માતે માસૂમ બાળકનું પણ મોત નીપજતા સદંતર બેસહારા અને ગરીબ પરિવાર ઉજડી ગયું છે. હોસ્પિટલની બહાર તેમના પરિવારજનો મહિલા અને તેના પુત્રના માટે રડતા તેમના આંસુ પથ્થર દિલના માણસને પણ રડાવી દે તેવા છે. જે ઘરમાં દિવાળીની ખુશીઓ આવવાની હતી, ત્યાં કાળું અંધારું છવાઈ ગયું છે.

કારમાંથી મળી બિયરની બોટલ, ચાલકની કરતૂત:-

અકસ્માત એટલો ભયાનક હતો કે ફૂટપાથ પર લોકોને કચડ્યા બાદ ફોર્ચ્યુનર કાર ધડાકાભેર બાજુની દીવાલમાં ઘૂસી ગઈ હતી. ઘટનાના ભયાનક અવાજને સાંભળીને આસપાસના સ્થાનિક લોકો તરત જ બચાવવા માટે દોડ્યા હતા.

સ્થાનિકોએ જ્યારે કારની તલાશી લીધી ત્યારે અંદરથી બિયરનું ટીન અને બોટલો મળી આવતા લોકોનો ગુસ્સો સાતમા આસમાને પહોંચ્યો હતો. નશામાં ધૂત ચાલકે દિવાળીની રાત્રે ગરીબોની જિંદગી સાથે ક્રૂર રમત રમી હતી.

સ્થાનિકોમાં ભારે આક્રોશ અને ગમગીની:-

તથ્ય પટેલ કાંડ જેવી ભયાનક ઘટનાઓ પછી પણ અમદાવાદના રસ્તાઓ પર અમીર નબીરાઓનો આતંક ઓછો નથી થયો, જેને પગલે સમગ્ર નિકોલ વિસ્તારમાં ભારે ગમગીની અને સાથે જ તીવ્ર આક્રોશનો માહોલ છે. સ્થાનિક લોકો કહી રહ્યા છે કે, “શું ગરીબોના જીવની કોઈ કિંમત જ નથી?

અમીરોના નશા પાછળ ગરીબો ક્યાં સુધી કચડાતા રહેશે?”

ઘટનાની જાણ થતાં જ ટ્રાફિક પોલીસનો કાફલો ઘટનાસ્થળે દોડી ગયો હતો. પોલીસે કારમાંથી મળેલા નશાના પુરાવાઓ એકત્ર કર્યા છે અને ચાલક વિરુદ્ધ માનવવધ તેમજ હિટ એન્ડ રનની કડક કલમો હેઠળ ગુનો નોંધીને જેલના સળિયા પાછળ ધકેલવા તજવીજ હાથ ધરી છે. પરંતુ કાનૂની કાર્યવાહી વચ્ચે પણ, જે પરિવારે પોતાની રોશની ગુમાવી દીધી છે, તે ક્યારેય પાછી નહીં આવે.