Total Users : 11660
Total views : 13641
Who's Online : 2
અહેવાલ-રીતેશ પરમાર (સિનિયર જર્નાલિસ્ટ)
અમદાવાદ:સમાજનું દર્પણ અને લોકશાહીની ચોથી જાગીર ગણાતા પત્રકારો પર હુમલો કરવો એ સ્વસ્થ સમાજ માટે અત્યંત ઘાતક અને ચિંતાજનક બાબત છે. પરંતુ અમદાવાદની નારોલ પોલીસે “પોલીસ ફાઈલ” ન્યૂઝ પેપરના પત્રકાર બિલાલ લુહાર ઉપર જીવલેણ હુમલો કરનારા ગુંડા મવાલી ટાઈપના માથાભારે તત્વોને કાયદાનું ભાન કરાવીને સમાજમાં એક મોટો અને કડક સંદેશ આપ્યો છે. પોલીસ કમિશનર સહિતના ઉચ્ચ અધિકારીઓની સૂચના અને નારોલ પોલીસ સ્ટેશનના સિનિયર પી.આઈ. જે.બી. અગ્રાવતના સુપરવિઝન હેઠળ પોલીસે પત્રકાર પર હુમલો કરનાર આરોપી મોહમદ હુસેનખાન કમર મોહમદ પઠાણને પાસા (PASA) હેઠળ અટકાયત કરી સીધો સુરતની લાજપોર મધ્યસ્થ જેલના સળિયા પાછળ ધકેલી દીધો છે.
લુખ્ખા તત્વોમાં ફફડાટ, પોલીસની કામગીરી પ્રશંસનીય:-
પોલીસની આ સિંઘમ સ્ટાઈલ કાર્યવાહીથી વિસ્તારના લુખ્ખા અને માથાભારે તત્વોમાં ફફડાટ વ્યાપી ગયો છે. સામાન્ય રીતે પત્રકારો જ્યારે સમાજની બદીઓ કે ગુનાખોરીને ઉજાગર કરે છે, ત્યારે આવા માથાભારે શખ્સો કાયદો હાથમાં લેવાની હિંમત કરતા હોય છે. પરંતુ નારોલ પોલીસે આ મામલે સહેજ પણ ઢીલાશ દાખવ્યા વિના આરોપીને પાસામાં ધકેલીને સ્પષ્ટ કરી દીધું છે કે, પત્રકારો પર આંગળી ચીંધનારાઓનું સ્થાન માત્ર અને માત્ર જેલના સળિયા પાછળ જ હશે.
આગળ જતાં કોઈ હુમલો કરવાની હિંમત નહીં કરે:-
નારોલ પોલીસની આ કડક કાર્યવાહી માત્ર એક ધરપકડ નથી, પરંતુ ભવિષ્યમાં પત્રકારો પર જીવલેણ હુમલાઓ કરવાનું વિચારતા ગુનાહિત માનસ ધરાવતા તત્વો માટે એક મોટી ચેતવણી છે. કાયદાના રક્ષકોએ બતાવી દીધું છે કે જો કોઈ પત્રકારની સુરક્ષા જોખમાશે, તો પોલીસ આવા તત્વોનો બરોબરનો પાઠ ભણાવશે. પત્રકાર જગત અને પ્રબુદ્ધ નાગરિકો દ્વારા નારોલ પોલીસની આ કડક અને ન્યાયી પ્રક્રિયાને ખુલ્લા દિલથી બિરદાવવામાં આવી રહી છે.
