દહેગામમાં નકલી સોનુ પધરાવી 6 લાખની ઠગાઈ કરતી સરદારનગરની મહિલા ઠગ ટોળકી પકડાઈ! SOG એ ગણતરીની કલાકોમાં અમદાવાદની 5 મહિલાઓને 3,43 લાખના મુદ્દામાલ સાથે ઝડપી પાડી

પ્રાપ્ત વિગતો મુજબ અમદાવાદ SOG પોલીસને દહેગામના બહિયલ ખાતે મહિલાઓ સાથે ઠગાઈ થવાની જાણ કરવામાં આવી હતી. જે સંદર્ભમાં SOG પોલીસે તપાસ હાથ ધરતા અમદાવાદના સરદારનગર ખાતેના સુભાષનગર ખાતે રહેતી મહિલાઓ સુમન મહાદેવ દેવી પૂજક, સુમન ઉર્ફે હીરા ગોગી શિવપ્રસાદ દેવીપૂજક, ગૌરી સુરેશ દેવીપૂજક, લલિતા સુરેશ દેવીપૂજક તેમજ સાવિત્રી સુભાષ દેવી પૂજકને પકડી પાડી હતી. તમને જણાવી દઈએ કે પોલીસે વધુ પૂછપરછ કરતા જાણવા મળ્યું હતું કે ઠગ મહિલાઓએ પૈસાની જરૂરિયાત હોવાના બહાને બહિયલમાં રહેતી સગી દેરાણી-જેઠાણીને ચાર સોનાની લગડીઓ સસ્તામાં આપવાની લાલચ આપી હતી. બંને મહિલાઓના ઘરમાં લગ્ન પ્રસંગ હોવાથી રકમ ભેગી કરી રાખી હતી. આ ભેગી રકમ માંથી 6 લાખ રૂપિયા દહેગામના નહેરુ ચોકડી પાસે ઈકો ગાડીમાં ઠગ મહિલાઓને આપ્યા હતા. ઘી વેચવાને બહાને આવતી મહિલાઓએ દોઢસો ગ્રામની સોનાની ચાર લગડીઓ બહિયલની મહિલાઓને આપી હતી અને ત્યારબાદ ઈકો ગાડીમાંથી ઉતરીને ફરાર થઈ ગઈ હતી.

બીજા દિવસે જયારે દેરાણી-જેઠાણી સોનાની લગડીઓ દહેગામ ખાતેના સોની પાસે લઈ જઈને ખરાઈ કરાવી ત્યારે જાણવા મળ્યું કે સસ્તા સોનાની લાલચમાં અમદાવાદની મહિલાઓ 6 લાખ રૂપિયાનો ચૂનો લગાવી ગઈ છે. ત્યારબાદ બંને મહિલાઓએ દહેગામ પોલીસ સ્ટેશનમાં સમગ્ર મામલે ફરીયાદ નોંધાવતા તપાસ હાથ ધરાઈ હતી. જે સંદર્ભમાં અમદાવાદ SOG એ ગણતરીની કલાકોમા અમદાવાદની મહિલા ઠગ ટોળકીને ઝડપી પાડીદહેગામ પોલીસને સોંપી હતી. હાલ આ તમામ મહિલા આરોપીઓ પાસેથી કુલ 3.43 લાખની રકમની રિકવરી કરી હતી. તો બીજીતરફ ઝડપાયેલી મહિલાઓને, કોર્ટમાં રજુ કરતા કોર્ટે આરોપીઓના ચાર દિવસના રીમાન્ડ મંજુર કર્યા હતા.