Total Users : 112
Total views : 213
Who's Online : 0
રીતેશ પરમાર ( ક્રાઈમ રીપોર્ટર )
બાયડ તાલુકામાં અગાઉ સરપંચ અને મહિલા વચ્ચેનો એક ચોંકાવનારી ઓડિયો વાયરલ થયા બાદ સૌથી મોટો ઘટસ્ફોટ થયો છે. જાણવાજોગ આધારે પોલીસે તપાસ કરતાં ઓડિયોમાં બોલનાર સરપંચ વિરુદ્ધ દુષ્કર્મની ફરિયાદ દાખલ થઈ છે. મહિલા સાથે બળજબરીથી બળાત્કાર ગુજાર્યો હોવાનો ગુનો સરપંચ અને તેના પુત્ર વિરુદ્ધ દાખલ થતાં ખળભળાટ મચી ગયો છે.
બાયડ પોલીસે આરોપી પિતા પુત્ર વિરુદ્ધ 376 મુજબ ગુનો દાખલ કરી વધુ તપાસ હાથ ધરી છે. સમગ્ર ઘટનાને પગલે પંથકમાં ચકચાર મચી ગઇ છે.
સાબરકાંઠા જિલ્લાના બાયડ તાલુકાના એક ગામે અગાઉ સનસનીખેજ ઓડિયો ક્લિપ વાયરલ થઈ હતી. જેમાં એક પુરુષ સામેવાળી મહિલાને અત્યંત ખરાબ ગાળો બોલી જા તારી સાથે મેં પણ દુષ્કર્મ કર્યું તેવું કહે છે. જેનો અટલ સમાચાર ડોટ કોમ દ્વારા રિપોર્ટ પ્રસિદ્ધ થયો હતો. જોકે આ ઓડિયો ક્લિપ વાયરલ થયા પહેલાં મહિલાએ બળાત્કાર અને જમીનના પૈસા મામલે ફરિયાદ અરજી આપી હતી. આથી બાયડ પોલીસે ઓડિયો ક્લિપ અને અરજી આધારે તપાસ કરી આખરે ગુનો દાખલ કર્યો છે. જેમાં બાયડ તાલુકાના લાંક ગામના સરપંચ કાળુસિંહ રામસિંહ ઝાલા અને તેના પુત્ર મનહરસિંહ કાળુસિંહ ઝાલા વિરુદ્ધ ફરિયાદ દાખલ થઈ છે. મહિલાની ફરિયાદ મુજબ સરપંચ અને તેના પુત્રએ ગત તા. 7/5/2020 થી અવારનવાર બળજબરીથી બળાત્કાર ગુજાર્યો હતો. આ સાથે જો આ વાત કોઈને કહીશ તો જાનથી મારી નાખવાની પણ ધમકી આપી હોવાનું મહિલાએ ફરિયાદમાં લખાવ્યું છે. લાંક ગ્રામ પંચાયતના સરપંચ અને તેના પુત્ર વિરુદ્ધ દુષ્કર્મની ફરિયાદ દાખલ થતાં પંચાયત આલમમાં ખળભળાટ મચી ગયો છે.
સૂત્રોએ જણાવ્યું હતું કે, મહિલાએ સરપંચ અને તેના પુત્ર સહિત કુલ 4 લોકો વિરુદ્ધ અરજી આપી હતી. જેમાં બાયડ પોલીસે તપાસ કરી 2 આરોપી વિરુદ્ધ ગુનો નોંધી કાયદેસરની કાર્યવાહી હાથ ધરી છે. મહિલાએ આરોપીઓ વિરુદ્ધ ગુનો દાખલ કરાવવા સ્થાનિક પોલીસ સ્ટેશનથી લઇને એસપી અને હાઇકોર્ટ સુધી દોડધામ કરી હતી. આખરે ગત સોમવારે બાયડ પોલીસ મથકે ફરિયાદ દાખલ થતાં જ લાંક ગામ સહિત સમગ્ર પંથકમાં ચકચાર મચી જવા પામી છે.
