Total Users : 111
Total views : 211
Who's Online : 1
અમદાવાદ શહેરના શિવરંજની વિસ્તારમાંથી એક દુઃખદ ઘટના સામે આવી રહી છે. જેમાં એક વકીલે પોતાના ઉપર પેટ્રોલ છાંટી સળગી જઈ આત્મહત્યા કરી હતી. પોલીસને આ મામલે જાણ થતા તાત્કાલિક ઘટના સ્થળે પહોંચી જઈ કાર્યવાહી હાથ ધરી હતી. પોલીસની પ્રાથમિક તપાસમાં આત્મહત્યા કરનાર વકીલે સુસાઈડ નોટ લખી હોવાની માહિતી સામે આવી રહી છે. આ સુસાઈડ નોટમાં વકીલે તેની પ્રેમિકા ઉપર આક્ષેપ કર્યા છે. જેથી પોલીસે વકીલ આત્મહત્યા કેસમાં સુસાઈડ નોટ અને અન્ય પુરાવાના આધારે આગળની તપાસ હાથ ધરી છે.
ઘટના વિશે મળતી વધુ માહિતી અનુસાર આપઘાત કરતા પહેલા વકીલે એક સુસાઇડ નોટ લખી હતી. જેમાં તેણે લખ્યું હતું કે, તેની પ્રેમિકા પૈસા પડાવીને તેને બ્લેકમેલ કરતી હતી.રન્નાપાર્કમાં રહેતો 35 વર્ષીય ભાગ્યેશ સાધુ મેટ્રો કોર્ટમાં વકીલ તરીકે પ્રેક્ટિસ કરતો હતો. 28 એપ્રિલે ભાગ્યેશ કોર્ટમાં જવાનું કહી નીકળ્યો હતો. દરમિયાન સાંજે તે શિવરંજની ચાર રસ્તા પાસે શરીર પર પેટ્રોલ છાંટી સળગી ગયો હતો, જેથી તેને હોસ્પિટલ લઈ જવાયો હતો, જ્યાં 30 એપ્રિલે તેનું મૃત્યુ થયું હતું.
આપને જણાવી દઈએ કે,ભાગ્યેશના ખિસ્સામાંથી એક ચિઠ્ઠી મળી હતી, જેમાં તેણે લખ્યું હતું કે તેની ગર્લફ્રેન્ડે જુઠ્ઠો પ્રેમ અને શારીરિક સંબંધો બનાવ્યા અને હવે મારી સાથે કૂતરા જેવો વ્યવહાર કરે છે, ખોટા આરોપો લગાવે છે અને ઘણો ખર્ચ કરે છે. સુસાઇડ નોટના આધારે ભાગ્યેશના પિતાએ ભાગ્યેશની પ્રેમિકા સામે ફરિયાદ નોંધાવી છે.સેટેલાઈટ પોલીસ સ્ટેશનમાં મણિનગરમાં રહેતી યુવતી વિરુદ્ધ દુષ્પ્રેરણાની ફરિયાદ નોંધાવી છે. જ્યારે આ યુવતીએ અગાઉ ભાગ્યેશ સામે છેડતીની ફરિયાદ નોંધાવી હતી.
